وحشتيــنــي

وحشتيني

وحشتني ايامي معاكي على اد ما هي قليلة وبسيطة على اد ما كانت اجمل ايام حياتي واللي عرفت فيها المعنى الحقيقي للسعادة , طول عمري بحلم اني اعيش أحلامي  وابقى مبسوط وانا موجود حد في حياتي بيحبني وبحبه بجد واوهبله قلبي بكل ما فيه ولا يجي يوم ابخل عليه.

اللي عمري ما تخيلته ان يكون في حياتي حد بجمالك بروحك الحلوة باحترامك لنفسك وليه ولاهلك بدمك الخفيف اللي بيهلكني من الضحك وخيالك الواسع اللي قرب كتير لخيالي واللي كنت مفكر انه في ملكوت لوحده محدش يقدر يوصله بحبك ليه  بلهفتك عليه وخوفك لما تكوني قلقانه في يوم عليه بشوقك لما تبقى نفسك في نظرة من عينيه لكل ما فيكي اللي بيحب كل ما فيه .

اجمل ايام حياتي عيشتها في قربك حبي لاهلي اتعلمته من حبك , الثقة اللي ما بينا واني مش هقلق في يوم من الايام من بعدي عنك لاني عرفت معاكي معنى انك تحب حد للدرجة اللي تخليك واثق انه اكيد هيصونك في غربتك, قلقي الوحيد عليكي في خوفي عليكي وانتي رايحه وانتي جايه إن كان عليه نفسي اخليكي في البيت قاعدة معززة مكرمه لحد ما انزل واخدك واحفظك في قلبي واغطي عليكي برموش عينيه, مش كلام افلام ولا حواديت واغاني ده الكلام اللي حاسس بيه قلبي واللي بيمني بيه نفسه انه يحققه زي ما حقق حلمه فيكي.
احلى حاجة في اللي انا فيه من سفر وغربة ولو اني ده اسوا حاجة قابلتها في حياتي خصوصا من بعد ما حبيتك وارتبطت بيكي , بس بجد الحاجة الوحيدة اللي فيه هو اني فعلا حسيت باد ايه انا بحبك واد ايه انتي بتحبيني معرفش لو كنت جنبك كنت ممكن احس بكل ده ولا لا . اللي متأكد منه اني مستني اليوم اللي ربنا يجمعني بيكي بفارغ الصبر .
بحبك بكل معنى الكلمة ونفسي اثبتلك ده بكل الطرق اللي وجدها ربنا في الدنيا دي . الحياة عندي مبقاش ليها معنى غير بوجودك فيها وكل اهدافي بقت موجهه ان تكون سعادتك هي الهدف الأسمى ليها , مبقتش اعرف حاجة في الدنيا اكتر من اني نفسي اعيش كل يوم فيها ليكي  واشوف فيه حبك  في قلبي بيكبر كل يوم عن التاني اكتر واكتر .
هو ده الحب اللي بكلمك عنه كل ما بتيجي فرصة اني اصرحلك بيه , وهو ده احساسي اللي يمكن مبقدرش اعبر عنه بالشكل المناسب عشان بعدي عنك .
تفتكري استاهل حبك؟!